Drivayè

Tche wòb ou santi krim

Kri fèt nan mitan lari gran jounen pou yon zanfan w ki viktim

Lamen m san m tresayi yon mouch vin poze sou po m li griye nwè

Lè m pale twòp

Lè souf mwen bout

Lè m pa jwenn dlo pou m vèse ankò

M pòtrè moun fou tchwè nan rasanble moso boutèy pou m voye a gòch, pou m voye a dwat sou gran chimen.

Moralite se pou sila ki nan lwil, dayè lwil la cho sou do pye m.

M konstate ke se ak movèz fwa leta bouskile m sou manmzè l lamizè

se ak malfezans enkonparab leta pran mache sou rèv mwen san konpasyon ak gwo bòt nèf edmi pa trèz li a

Fyèl mwen preske pete, se wè pou n ta wè.

Sal paka kalifye m, yo plede kalifye m de sa m pa ye

Midi kou minwi chèf ap kalote m pou chive m ki nan tèt mwen.

Mwen se retay yon bon twèl, tay mwen pa si anpil ke sa menm gen wotè tout malè san sa m tap glase deja

Lanp tèt gridap mwen an limen chak flanm pote yon mesaj

Se pa gaz ki andidan l se san, se swè

Liberasyon pa fèt lajounen, fòk lèzany enplike.

M chwazi anyen pou n ka tout bagay

M reziyem

Fyouw m lanse yon dènye boutèy sou tchè manman leta

M pwal pran yon dènye sabòt

M reziye m

Eskize m lepèp, leta pi voksal ke sa.

Backer Fritz Stanley