M kandida

M ap chèche konprann kiyès ou ye. M bout lespri m nan je w, 2 boul solèy nan tèt ou klere tout dezi ki pote anndan m. Kè m rakousi nan men w, pa peze l, twòp defo m ka koule sou ou. Jis netwaye l, epi mete l tou pre pa w la. Omwen yo ta fè ti ba tiout tiout. M ret kwè chak kwen dan w gen yon pwezi ki ekri ladan l. Chak fwa w souri, pwezi ponn yon nouvo mo. Kite m di w m kandida. Wi, m kandida, m pa gen konn pouki rezon. M p ap pwomèt anyen, m se nèg nwa, m pa gen po wòz. Sèlman m konn ki kapasite m genyen chak lè m konn se pou ou mwen dwe kontinye fè lèzonyon pou lavi.

M vle w klè sou sa, m kandida pou m genyen w. Ou pa richès ni pouvwa, ou jis sa lavi te bezwen konplete a pou l te gen sans. Si tout moun gade ak 2 je, m jis pale ak 2 pa m yo. Pafwa w mòde bouch ou jan vag lanmè a monte sou wòch yo, pito m te sab, m tap tou ale avè w, zafè si w te mennen m tounen aprè. M kandida. Pa mande m sa pou m pote, m pa gen anyen. Sèl sa ka di w m kandida san tèt mwen pa kale, m pa gen bannann, m pa pitit pèsonn, m jis kandida san pwogram.

M pa konn ki chwa w, sèl sa m garanti tout sa w deside ki bon pou ou, m genyen. Se bonè w m ap chèche. Si w twouve nan mwen sa w vle a, banm manda kè w ak kò w. Si se pa mwen, bay pwezi a li. M kwè se pwezi ki gen pi bon pwogram politik lavi byennèt ou vle a. Fè yon chwa, swa w pran m oubyen pwezi. M kandida.

Gathely D. CHERY